Ұлттық экономика министрлігі жылдық 1,3 трлн теңге салық жеңілдіктерін Салық кодексінен алып тастауды жоспарлап отыр. Бұл туралы Сенатта өткен дөңгелек үстелде вице-министр Арман Қасенов мәлім етті.
«Біз жүргізген аудит 3,4 трлн теңгені құрайтын 453 жеңілдікті анықтады. Бұл үлкен сомалар – республикалық бюджеттің 13-14%-ы. Оның ішінде 1,3 трлн теңгеден асатын 128 преференцияның күшін жою ұсынылып отыр», — деді Қасенов.
Бұл ретте инвесторларға ғимараттарды, құрылыстарды, машиналарды, жабдықтарды және бағдарламалық қамтамасыз етуді сатып алу немесе салу кезінде салықтық жеңілдіктер ұсынылады. Осындай салық шегерімі қайта құруға, жаңғыртуға, күрделі және ағымдағы жөндеуге жұмсалған шығындарға да ұсынылады.
«Ескі және рентабельді емес кен орындарында жаңа кен орындарын ашу және өндірудің тұрақты деңгейін сақтау үшін ынталандыру шаралары ұсынылуда», — деді Қасенов.
Инвестициялық келісімшарт жасасқан кәсіпкерлер үшін ағымдағы жеңілдіктер сақталды. Қызметтің басым түрлерін жүзеге асыратын АЭА қатысушыларына да жеңілдіктер сақталды.