Komtrans Astana+BUSexpo Astana және Eurasian Construction Technology Astana 2025 көрмелері аясында Қазақстан, Қытай, Түркия және Өзбекстаннан 230-дан астам компания қатысып, көрмеде өндірістік әлеует пен технологиялық шешімдер ұсынылды.
Көрме барысында 300-ден астам B2B-кездесу өткізіліп, 100-ге жуық кооперациялық бастама ұсынылды.
Нәтижесінде 200 млн теңгеден астам сомаға келісімшарт жасалды.
Айта кету керек, Komtrans Astana + BUSexpo Astana және Eurasian Construction Technology Astana 2025 көрмелері елімізде коммерциялық көлік пен жол-құрылыс техникасын бір алаңда тоғыстырған алғашқы ірі халықаралық көрме.
Ұйымдастырушылардың дерегінше, көрмеде 50-ге жуық техника бірлігі көрсетіліп, оның ішінде жаңа үлгілер алғаш рет қалың жұртшылық назарына ұсынылған. Әлбетте, атқарылған жұмыс қорытындысы ретінде коммерциялық техника мен жол-құрылыс машиналары сатылған. Мұндай көрсеткіш көрменің тиіімділігі мен нақты экономикалық әсерін көрсетеді.
Жалпы көрмені 2899 астам адам тамашалап, мамандар мен салалық сарапшылар арасындағы байланыс нығая түсті.
«Komtrans Astana + BUSexpo Astana – бұл жай ғана көрме емес. Бұл – серіктестікке жол ашатын, нақты жобаларға ұласатын, индустриялық серпінге серік болатын алаң. Біз бұл форматты келесі жылы да жалғастыруды жоспарлап отырмыз», — дейді көрме ұйымдастырушы, Business Media Central Asia басшысы Әнуар Мәлік.