Микроқаржылық қызметті жүзеге асыратын ұйымдардың активтері 2024 жылғы IV тоқсанда 2,1% ұлғайып, 2025 жылғы 1 қаңтардағы жағдай бойынша 3,0 трлн теңгені құрады (2024 жылы 17,6% өсім). Активтердің ұлғаюына микроқаржы ұйымдарының несие портфелінің өсуі себеп болды.
МҚҚЖҰ құрылымында активтердің ең көп үлесі микроқаржы ұйымдарына – 1,7 трлн теңге немесе 57,4%, кредиттік серіктестіктерге – 0,9 трлн теңге немесе 29,6%, ломбардтарға – 0,4 трлн теңге немесе 13,1% тиесілі.
МҚҚЖҰ-ның несие портфелі 2024 жылғы IV тоқсанда 2,0% 2,8 трлн теңгеге дейін ұлғайды (2024 жылы 15,0% өсім). МҚҚЖҰ микрокредиттері құрылымында бизнес субъектілеріне берілген микрокредиттердің үлесі 58,9%-ды, халыққа берілген микрокредиттердің үлесі 41,1%-ды құрады.
Бизнес субъектілеріне берілген қарыздар 2024 жылғы IV тоқсанда негізінен микроқаржы ұйымдарының жеке тұлғаларға, оның ішінде дара кәсіпкерлерге тұтынушылық мақсаттарға берген микрокредиттерінің есебінен 0,1%- 1,6 трлн теңгеге дейін ұлғайды (2024 жылы 16,4% өсім).
Халыққа берілген қарыздардың көлемі 2024 жылғы IV тоқсанда негізінен халыққа берілген микрокредиттер құрылымында үлесіне 77% тиесілі болатын микроқаржы ұйымдары берген микрокредиттердің ұлғаюы есебінен 4,7% ұлғайып (2024 жылы 12,9% өсім) 2025 жылғы 1 қаңтардағы жағдай бойынша 1,2 трлн теңгені құрады.
МҚҚЖҰ портфеліндегі 90 күннен астам төлем мерзімі өткен берешегі бар қарыздардың (NPL90+) деңгейі 2025 жылғы 1 қаңтарда 4,5%-ды құрады (01.01.2024ж. – 4%).
2024 жылғы IV тоқсанда МҚҚЖҰ-ның міндеттемелері 0,5% 2,0 трлн теңгеге дейін ұлғайды (2024 жылы 15,9% өсім). Қорландыру құрылымындағы негізгі үлес алынған қарыздарға тиесілі болады, олардың үлесі жиынтық міндеттемелердің 69,5%-ын немесе 1,4 трлн теңгені құрайды. Міндеттемелердің ұлғаюына микроқаржы ұйымдарының өзге де міндеттемелерінің өсуі себеп болды.
МҚҚЖҰ-ның меншікті капиталы негізінен жарғылық капиталдың және қазіргі кезеңдегі бөлінбеген пайданың ұлғаюы есебінен 2024 жылғы IV тоқсанда 5,2% ұлғайып, 2025 жылғы 1 қаңтардағы жағдай бойынша 1,0 трлн теңгені құрады (2024 жылы 20,9% өсім).