Өткен сенбіде Алматыда Қазақстандағы Цифрландыру күніне орайластырылған, отандық цифрлық индустрия үшін аса ірі оқиға — Digital Day 2025 өз мәресіне жетті. Оны еліміздегі ірі салалық қоғамдастық — Qazaq IT Community осымен үшінші рет ұйымдастырды.
Digital Day 2025 іс-шарасының орталық тақырыбы Қазақстанның жаңа цифрлық экономикасының негізгі элементтерін — адамның талантын, қарқынды дамып келе жатқан жасанды интеллект мүмкіндіктерін және ынтымақтастықты пайдалана отырып, синергияға қалай қол жеткізуге болатыны туралы мәселеге арналған.
Биылғы іс-шара 400-ден астам қатысушының басын қосты, олардың арасында IT нарығының, мемлекеттік органдардың, ірі корпорациялардың, венчурлық қорлардың, университеттердің өкілдері, сондай-ақ әртүрлі қазақстандық жоғары оқу орындарының бейіндік мамандықтарында оқитын студенттер бар.
ҚР премьер-министрі орынбасарының — жасанды интеллект және цифрлық даму министрінің кеңесшісі Асқар Білісбеков өзінің қарсы алу сөзінде атап өткендей, үшінші Digital Day іс-шарасының жоғары деңгейі Қазақстан IT индустриясының белсенді өсу кезеңіне аяқ басқанын растайды.
«Дәл қазір біз елімізде ашық экожүйелер мен технологиялық серіктестіктер мәдениетінің қалыптасып келе жатқанын көріп отырмыз. Бұл — нарықтың корпорациялар, стартаптар, мемлекет және университеттер арасындағы терең өзара әрекеттесуге бет бұрғанының айғағы және заман талабының көрінісі», – деп атап өтті ол.
Осыған ұқсас пікір білдірген Алматы қаласы әкімдігінің цифрландыру басқармасының басшысы Олжас Жаңабек елдің интеллектуалдық капиталының дамуы үшін бизнестің, жоғары оқу орындарының және мемлекеттің ынтымақтастығы қажет екенін атап өтті.
«Ұлттық экономиканың үдемелі дамуын және бәсекеге қабілеттіліктің жылдам өсуін қамтамасыз ету үшін нарыққа қатысушылар мен мемлекет тиімді өзара әрекеттесуі қажет. Алматы әкімдігі өз тарабынан бұған қол жеткізу үшін бар күш-жігерін салады», – деді ол.
Цифрлық трансформацияда жоғары білім маңызды рөл атқаратынын ескере отырып, еліміздің жетекші жоғары оқу орындарының бірінші басшылары: Astana IT University ректоры Альтаир Ахметов, Narxoz Business School деканы Гүлнәр Күреңкеева, ҚазБСҚА ректоры Бақтияр Сәбденәлиев, ҚБТУ ректоры Маратбек Ғабдуллин, Халықаралық Бизнес Университетінің (UIB) ректоры Анар Махметова осы процесті талқылауға белсенді түрде қатысты.
Білімге және цифрлық экономикаға арналған сессия барысында жоғары оқу орындарының өкілдері бүгінгі таңда университеттерге елдің қарқынды дамып келе жатқан IT секторы үшін кадрлар даярлауда ерекше жауапкершілік жүктелетінін атап өтті.
Сонымен қатар, Халықаралық ақпараттық технологиялар университетінің цифрландыру және инновациялар жөніндегі проректоры Нұржан Дүзбаев модераторлық жасаған бұл панельде білім беру бағдарламаларын тезірек бейімдеу, индустриямен тиімді серіктестіктер құру және жас мамандардың бойында болашақ экономикаға қажет икемді машықтарды қалыптастыру үшін жоғары оқу орындары қандай шаралар қолдана алатыны туралы сөз қозғалды.
Digital Day іс-шарасындағы екінші негізгі тақырып — нарықтың, корпорациялардың және венчурлық қорлардың ынтымақтастығы тақырыбы корпорациялар мен венчурлық қорлардың өзара әрекеттестігіне арналды. Сарапшылардың, соның ішінде ЦентрКредит банкі (BCC), Beeline және венчурлық компаниялар өкілдерінің пікірінше, цифрлық трансформацияны жеделдету үшін корпорациялардың инновацияларды интеграциялауда икемдірек болғаны маңызды. Екінші жағынан, сессияға қатысушылар венчурлық қорлар мен стартаптар өз командаларының тұрақтылығына, кәсібилігіне және басқару сапасына көбірек көңіл бөлуі қажет екеніне де келісті.
Сессия модераторы, Women in Tech Kazakhstan басшысы, Qazaq IT Community қоғамдастығының негізін қалаушы, ҚР премьер-министрі орынбасарының — жасанды интеллект және цифрлық даму министрінің кеңесшісі Әсем Болатжанның айтуынша, Digital Day 2025 іс-шарасы аясындағы пікірталасқа индустрия өкілдерінің белсенді қатысуы — бүкіл нарық үшін маңызды оқиға, ол ірі бизнестің технологиялық компаниялармен ынтымақтастыққа және өзара әрекеттесудің ашық тетіктерін құруға дайын екенін көрсетеді.
«Кез келген стартап пен ынтымақтастықтың іске қосылуы — корпоративтік сектор мен стартаптар бірлесе жұмыс істеп, синергияға қол жеткізетін жетілген инновациялық экожүйенің қалыптасып келе жатқанын көрсететін маңызды сигнал. Қазір біз Қазақстанда дәл осыны көріп отырмыз», – деді ол.
Digital Day 2025 іс-шарасы алғашқы BCC Startup Battle өткізумен аяқталды, оған байқауға қатысуға берілген 120 өтінімнің арасынан іріктеп алынған 10 стартаптың 9 финалисі қатысты. 1 млн теңгелік жүлде қоры үшін күрес барысында қатысушылар банк пен венчурлық қорлардың өкілдеріне және тәуелсіз сарапшыларға өз жобаларын ұсынды. Барлық жобаларды мұқият қарап шыққан қазылар алқасы бірден екі стартапты — Ailat және Beneteria жобаларын жеңімпаз деп таныды. Бұл стартаптар өз жобаларын пилот режимде іске қосу, сынақтан өткізу, содан кейін ЦентрКредит банкінің (ЦКБ) қолдауымен нарыққа шығу мүмкіндігіне ие болады.
Бұл Қазақстанда және бүкіл Орталық Азия аймағында бірегей болып табылатын, әртүрлі қызметтер мен өнімдерді бір платформада біріктіретін ЦКБ ашық экожүйесінің іске қосылуы арқасында мүмкін болды. Бұл клиенттердің өзара және банк серіктестерімен, соның ішінде мобильді қолданба арқылы да тиімді өзара әрекеттесуін мүмкіндік етеді.