Сәуір айында қазақстандық коммерциялық банктер мен Қазақстанның Даму банкі бизнеске 20,1 трлн теңге несие берді. Ай сайынғы көрсеткіш 604,4 млрд теңгеге немесе 3,1% өсті. Бұл осы кезеңдегі халыққа берілген несие өсімінен (1,5%) екі есе көп, деп хабарлайды ҚР Ұлттық банкі.
Экономикаға берілген барлық несиелердің құрылымындағы бизнесті несиелендіру үлесі 2025 жылдың ақпан айынан бері алғаш рет өсті. Егер наурызда бұл көрсеткіш 45,6%-ды құраса, сәуірдің аяғында – 46%-ды құрады.
Айдың соңына қарай бизнесті несиелендірудің өсімі халықты несиелендіру көрсеткіштерінен асып түсетін жағдайлар Қазақстан экономикасында сирек емес. 2022 жылдың қаңтарынан бастап, 41 ай ішінде бұл 11 рет болды. Алайда, осы уақыт ішінде несие сегменттерінің өсу қарқынындағы екі еседен астам айырмашылық тек бір рет – 2024 жылдың қаңтарында болды. Содан кейін бизнес несиелерінің өсімі 5,6% деңгейінде болды, ал халықтікі – 1,9%, яғни үш есе дерлік төмен.
Соңғы 3,5 жылда Қазақстан Республикасының халқына берілген несие көлемі 2,2 есе, яғни 11 трлн теңгеден 23,6 трлн теңгеге дейін өсті. Осы уақыт ішінде бизнесті несиелендіру көлемі 1,6 есе ғана өсті. Елімізде берілген барлық несиелер құрылымында халықты несиелендіру үлесі алғаш рет 2022 жылдың қазан айында 50%-дан асты, содан бері бұл сегмент Қазақстанның борыш нарығындағы көшбасшылықтан түскен жоқ. 2022 жылдың қаңтарынан 2025 жылдың мамырына дейін көрсеткіш 46,2%-дан 54%-ға өсті.