Бүгін Sergek жобасының негізін қалаушы Әсет Ахметов елордадағы интеллектуалды бейнебақылау жүйесінің болашағына қатысты өзінің әлеуметтік желі парақшасында мәлімдеме жасады. Естеріңізге сала кетейік, бүгін Сергектің Астанадан алынатыны айтылған еді.
«Біздің мемлекеттік-жекеменшік әріптестік шарты өз мәресіне жетті. Бұл – заңды процесс. Бірақ бұл Sergek-тің аяқталуы емес, керісінше, жаңа кезеңнің басталуы. Біз үшін Астана қаласындағы жоба ерекше мәнге ие, себебі дәл осы жерден біздің үлкен сапарымыз басталды. Алғашқы қадамдар, алғашқы жетістіктер, алғашқы сын-тегеуріндер – осының бәрін біз осында бастан өткердік. Біз кішігірім іс бастадық, бірақ үлкен мақсат қойдық – технология арқылы қалаларда қауіпсіз орта қалыптастыру», — деді ол.
Жоба жылдар өте өз тиімділігін дәлелдеп қана қоймай, қоғамға нақты пайдасын тигізді:
- Жол апаттарынан болатын өлім-жітім – 48% төмендеді;
- Қоғамдық орындардағы қылмыс деңгейі – 67% азайды;
- Жол ережелерін бұзу жағдайлары – 72% қысқарды;
«Бұл тек сандар емес. Бұл – нақты құтқарылған өмірлер, қауіпсіздікке деген сенім және технологияның қоғам игілігіне жұмыс істей алатынының дәлелі», – деді Ахметов.
Sergek командасы жүйенің барлық рұқсаттары мен басқару қолжетімділігін мемлекеттік серіктестерге толықтай тапсырғанын, сондай-ақ жаңа қызмет көрсетуші компанияға өтпелі кезеңді сәтті еңсеруге көмектесетінін мәлімдеді. Сонымен қатар, Астанадағы жаңа серіктестермен бірлескен жұмыс жүргізу жөнінде келіссөздер басталғанын айтты.
Sergek – бүгінде Қазақстанның көптеген қалаларында табысты жұмыс істеп жатқан маңызды қауіпсіздік жүйесі. Ақтау, Тараз, Семей, Түркістан, Шымкент, Атырау, Алматы, Қызылорда, Талдықорған, Құлсары және Жетісу облысында жүйе өз тиімділігін дәлелдеп келеді. Сондай-ақ, Алматы облысында ауқымды жоба іске асырылып, Sergek технологиялары енді халықаралық нарыққа жол тартуға дайындалуда.
«Бұл – үлкен тәжірибе мен даму кезеңі. Біз тоқтамаймыз. Қауіпсіздік саласында үздік шешімдерді ұсынуды жалғастырамыз. Sergek – бұл тек Қазақстанның бренді емес, болашақта халықаралық деңгейдегі технологиялық көшбасшылардың бірі болады!» – деп түйіндеді Әсет Ахметов.