Қазақстанда қазір 125 мектеп интернетке қосылмаған. Бұл туралы бүгін Үкімет отырысында Цифрлық даму, инновациялар және аэроғарыш өнеркәсібі министрі Жаслан Мәдиев хабарлады.
«Қазақстанда 8 042 мектеп бар, олардың 7 917-і интернетке қосылған. Оның ішінде талшықты-оптикалық байланыс арқылы – 4 663 мектеп, басқа технологиялар бойынша – 3 254 мектеп (радиорелейлік байланыс – 1 093 мектеп; Starlink – 1 657 мектеп; ADSL – 263 мектеп; LTE-модемдер – 144 мектеп; спутниктік технологиялар арқылы – 97 мектеп)», – деді ол.
Сонымен қатар, талшықты-оптикалық байланысқа қосылмаған 3 254 мектептің ішінен ары кетсе 450-і талшықты-оптикалық байланысқа қосуға жақын, себебі байланыс желісі елді мекенге дейін жеткізілген.
«Бұл жағдайда жергілікті атқарушы органдарға аталған мектептерге дейін талшықты-оптикалық желіні өздері немесе байланыс операторларын тарта отырып жеткізуді тапсыруды сұраймыз», – деді Жаслан Мәдіев премьер-министрге.
2018–2020 жылдары 1 342 мектеп мемлекеттік-жекеменшік әріптестік 1.0 жобасы аясында оптикаға қосылды; 2024 жылы 1 657 мектеп Starlink технологиясы бойынша қосылды; 2025 жылы операторлардың күшімен 311 мектеп оптикаға ауыстырылды.
«Сондай-ақ, министрлік пен Қазақтелеком арасындағы инвестициялық келісім аясында 2025–2026 жылдары серіктес есебінен 2 010 мектепке талшықты-оптикалық байланыс жеткізіледі. 2025 жылы – 819 мектеп; 2026 жылы – 1 191 мектеп. Бұл жұмыс аяқталған соң барлық мектептерде жылдам интернет болады», – деп нақтылады ол.