Ұлттық банктің төраға орынбасары Әлия Молдабекова жеке компанияларға зейнетақы активтерін басқаруға қатаң талаптар қойылғанын айтып, оларға барлық зейнетақы жинақтарын беру қазақстандықтар үшін қауіпсіз болатынын мәлімдеді. Оның сөзінше, әрбір азамат зейнетақы қаражатын басқарушы қазіргі бес компанияның қызметі мен табыстылығын өз бетінше зерттей алады.
2013 жылға дейін қазақстандықтар зейнетақы жинақтарын әртүрлі жеке меншік қорларда сақтай алатын, бірақ кейбірі теріс табыс көрсетіп, шығынға ұшыраған. Осыдан кейін негізгі активтерін Ұлттық банк басқаратын Бірыңғай жинақтаушы зейнетақы қоры құрылды. Соңғы уақытта реттеуші орган өкілдері азаматтарға зейнетақы жинақтарының барлығын (қазір тек 50%-ын ғана) жеке басқарушы компанияларға аударуға мүмкіндік беруді ұсынып отыр. Сенаттағы брифингте журналистер бұл қаншалықты қауіпсіз екенін және салдары үшін кім жауап беретінін сұрады.
Әлия Молдабекова қазіргі таңда елде зейнетақы активтерін басқаратын бес жеке компания жұмыс істейтінін айтты. Алайда олардың басқаруындағы қаражат көлемі аз: Ұлттық банкте шамамен 25 трлн теңге болса, жеке компанияларда небәрі 100 млрд теңге.
Оның айтуынша, таңдау салымшының өз еркінде. Қаржы нарығын реттеу және дамыту агенттігі мен Ұлттық банк бұл компанияларға рұқсат беру кезінде үлкен жұмыс атқарған. Негізгі талаптар: кемінде 1,7 млрд теңге меншікті капитал, активтерді басқаруда кемінде 3 жыл тәжірибе, жоғары кредиттік рейтингі бар ірі акционердің болуы және шығынды қызмет фактілерінің болмауы.
Сонымен қатар салымшыларды қорғау үшін орташа табыстылық механизмі енгізілген. Егер қандай да бір компанияның табыстылығы белгіленген деңгейден төмен болса, ол айырмашылықты клиенттерге өтеп беруге міндетті.
Молдабекованың айтуынша, жеке басқарушылардың табыстылығы Ұлттық банкке қарағанда жоғары, себебі олар қаражатты көбейтуге басымдық береді. Ал Ұлттық банк активтерді сақтауға бағытталған консервативті саясат ұстанады.
Сондықтан қазір халықтың жеке басқарушы компанияларға қызығушылығын арттыру және зейнетақы жинақтарының табыстылығын өсіру үшін қосымша талаптар енгізу мәселесі қарастырылып жатыр.