Қазақстанда жеңіл автокөліктерді тіркеу көлемі айтарлықтай азайды. Қыркүйек айында бұл көрсеткіш екі есе төмендеді, деп хабарлайды DataHub.
Қыркүйекте небәрі 78 мың жеңіл көлік есепке қойылған — бұл 2022 жылғы сәуірден бергі ең төменгі деңгей. Айлық және жылдық көрсеткіштермен салыстырғанда көрсеткіш екі есе төмендеген.
«Көрсеткіш күрт төмендемей тұрып, автокөліктерді тіркеу саны ұзақ уақыт бойы жоғары деңгейде (110 мыңнан астам) сақталды. Ерекше жағдай тек 2023 жылғы тамыз және 2025 жылғы қаңтар айларында байқалды. Бұл 2023 жылдың басынан басталған шетелдік нөмірлі көліктерді заңдастыру науқаны кезеңіне тұспа-тұс келді. 2024 жылға қарай науқан аяқталып, азаматтарға мұндай көліктерді тек Қазақстанда тіркеуден өткізгеннен кейін ғана жүргізуге рұқсат берілді. Дегенмен, бұл фактор тіркеу көлемін азайтқан жоқ – 2024 және 2025 жылдары көрсеткіштер жоғары деңгейде қалды», – делінген хабарламада.
2025 жылдың сәуірінен бастап Ұлттық статистика бюросы автокөліктерді тіркеу деректерін бірінші рет және қайта тіркелгеніне қарай бөліп жариялай бастады және екі категорияда да өткен аймен салыстырғанда төмендеу байқалды.
Негізгі құлдырауға жалпы көлемдегі басым үлесті алатын қайта тіркеу көрсеткіші әсер еткен — олардың саны 51,5 мыңға азайып, 71,4 мыңға түсті. Сонымен қатар бірінші рет тіркеу де қысқарды — 15,2 мыңға азайып, небәрі 6,6 мың автокөлік тіркелген.