Бұрын сатып алу құқығынсыз берілген жалдамалы тұрғын үйді 70 мыңға жуық қазақстандық жекешелендіре алады. Бұл туралы Орталық коммуникациялар қызметінде өткен брифингте Өнеркәсіп және құрылыс министрлігі Құрылыс және тұрғын үй-коммуналдық шаруашылық істері комитетінің төрағасы Бақытжан Жүнісбеков мәлімдеді.
Оның сөзінше, 2025 жылы тұрғын үйге мұқтаж жандарды есепке алу және жалдамалы баспананы бөлу функциялары әкімдіктерден ұлттық даму институтына айналған Отбасы банкіне берілді. Қазіргі уақытта есепте 951 мың азамат тұр, оның 600 мыңға жуығы — әлеуметтік жағынан әлсіз санаттағылар.
Бір жыл ішінде 8 мыңға жуық жалдамалы пәтер беріліп, 11 мыңнан астам жеңілдетілген ипотекалық қарыз үлестірілді. Бұл ретте жалдамалы баспананы жекешелендіру құқығы ерікті сипатқа ие. 2025 жылы бұл мүмкіндікті 15 мыңнан астам азамат пайдаланды, оның 9 мыңға жуығы баспананы өтеусіз алды.
2025 жылы 15 мыңнан астам азамат бұрын бөлінген жалға берілетін тұрғын үйді «сатып алу құқығынсыз» жекешелендіру құқығын пайдаланды. Олардың шамамен 9 мыңы тұрғын үйді тегін алды.
Қазақстан Республикасы Өнеркәсіп және құрылыс министрлігінің Құрылыс, тұрғын үй және коммуналдық шаруашылық істері комитетінің төрағасы Бақытжан Жүнісбеков мемлекеттік қолдаудың қосымша шараларына тұрғын үй жалдау ақысының бір бөлігін субсидиялау және тұрғын үй сертификаттарын беру кіретінін атап өтті.
«11 мыңнан астам азамат субсидияларды пайдаланды, бұл мақсаттарға республикалық бюджеттен 7,6 млрд теңге бөлінді. 2026 жылы 11 мың азаматқа жалдау ақысын субсидиялау жоспарлануда», – деді Бақытжан Жүнісбеков.