Қаржылық мониторинг агенттігі экономикалық құқық бұзушылықтарға қатысы бар қазақстандықтар мен ұйымдар енгізілетін арнайы тізілімді іске қосуды жоспарлап отыр. Тиісті бұйрық жобасы «Ашық НҚА» порталында жария талқылауға шығарылды.
Құжатта жеке және заңды тұлғалардың бұл тізімге қалай енетіні немесе одан қалай шығарылатыны туралы ережелер белгіленген.
Жобаға сәйкес, деректер базасына экономикалық қылмыс жасауға қатысы бар екені туралы расталған мәліметтері бар тұлғалар енгізіледі.
Ережелерде мыналар жазылған:
- есепке қою негіздері;
- есептен шығару тәртібі;
- тізімде көрсетілетін мәліметтер;
ақпаратты сақтау мерзімдері.
Қаржылық мониторинг агенттігі мұндай тізімді жасау құқық бұзушылықтың алдын алу үшін қажет екенін түсіндіреді. Басты мақсат — қоғам мен бизнесті ықтимал тәуекелдер туралы хабардар ету. Кәсіпкерлер бұл тізім арқылы болашақ серіктестерін тексере алады және сенімсіз тұлғалармен ынтымақтастық орнатудан сақтанады.
Бұл ережелерді әзірлеу 2025 жылғы 30 желтоқсанда қабылданған «Құқық бұзушылықтардың профилактикасы туралы» заң нормаларына негізделген. Құжатты жария талқылау 2026 жылғы 19 ақпанға дейін жалғасады.