Фермерлік шаруашылықтардың сиыр етін экспорттауға қатысуына қойылатын минималды талапты едәуір жеңілдету ұсынылуда. Тиісті өзгерістер жобасы «Ашық НҚА» порталында жарияланып, 19 наурызға дейін қоғамдық талқылауға шығарылды.

Жаңа ережелерге сәйкес:

• Өз ет комбинаты бар шаруашылықтар енді кемінде 500 бас ірі қара болған жағдайда ет экспорттай алады (бұрын ең төменгі шек 5 мың бас болатын);
• Өзінің өңдеу қуаты жоқ ірі фермалар да экспортқа шығу мүмкіндігін алады, бірақ олардың мал басы 5 мыңнан жоғары болуы тиіс. Мұндай жағдайда ет басқа ет комбинаттары арқылы экспортталады.

Қазір жартыжылдық экспорттық квота шаруашылық көлеміне байланысты бөлінеді:

• шамамен 5 мың бас – 1 мың тоннаға дейін
• 10 мың бас – 2 мың тоннаға дейін
• 15 мың бас – 3 мың тоннаға дейін
• 20 мың бас – 4 мың тоннаға дейін
• шамамен 50 мың бас – 10 мың тоннаға дейін.

Негізгі талап өзгермейді: ет шаруашылықтың өз малынан өндіріліп, өз қуатында өңделуі тиіс.

2026–2030 жылдарға арналған мал шаруашылығын дамыту жөніндегі кешенді жоспарға сәйкес:

• ет экспорты екі есе өсіп, 165 мың тоннаға жетуі тиіс;
• ірі қара саны 12 млн басқа дейін ұлғайтылады.

Экспорттың негізгі бағыттары – Парсы шығанағы елдері және басқа да мұсылман мемлекеттері. Жоспар бойынша, елдегі ет өндірісі 1,2 млн тоннадан 1,8 млн тоннаға дейін артуы мүмкін.