2026 жылдың 1 қаңтарынан бастап Қазақстанда жаңа көліктердің бағасы шамамен 3–4% өседі. Бұл туралы Қазақстан автокөлік одағының (ҚАО) президенті Анар Мақашева мәлімдеді.
Оның айтуынша, қымбатшылық тек импорттық модельдерге қатысты болады, ал отандық құрастырылымдағы көліктердің бағасы өзгермейді. Оның ойынша, 2026 жылдан бастап ҚҚС (НДС) мөлшерлемесі 12%-дан 16%-ға дейін көтерілгеніне қарамастан, қазақстандық зауыттар өндірісті оңтайландыру және локализацияны тереңдету арқылы баға өсімін тежеп қалуға тырысады.
Автокөлік одағының басшысы мұндай модельдерге деген сенім деңгейі артып келе жатқанын атап өтті. Өйткені қазақстандық зауыттардың қуаты тек құрастыруды ғана емес, сонымен қатар кейінгі сервистік қызмет көрсетуді де қамтамасыз етеді. Бұл ұзақ мерзімді перспективада жергілікті көлікке иелік етуді арзанға түсіреді.
«Сатып алу бағасы — шығынның жалғыз факторы емес. Автокөлік иелері шығынының басым бөлігі сервиске кетеді. Нарықтағы құбылмалы кезеңде қосалқы бөлшектер мен құрамдауыштарды шетелден сатып алу қиындап, қымбаттай түседі. Соның нәтижесінде отандық автомобильді ұстаудың жалпы құны тіпті төменірек болуы мүмкін», — деді ол.