2026 жылғы 1 қаңтардан бастап жеке кәсіпкерлер салық органдарынан өздерінің салық режимін – оңайлатылған декларацияны немесе жалпыға бірдей белгіленген режимді растау қажеттігі туралы хабарламалар ала бастайды.

Қаржы вице-министрі Ержан Біржановтың айтуынша, қазіргі таңда шамамен 1,9 млн жеке кәсіпкер оңайлатылған декларация режимінде жұмыс істеп отыр. Оларға 2026 жылғы 1 наурызға дейін салық органдарына оңайлатылған режимді сақтайтыны немесе жалпы режимге өтетіні туралы хабарлама жолдау қажет.

Біржановтың сөзінше, мемлекет хабарлама беруді ұмытып кеткендерге айыппұл санкцияларын қолдануды жоспарлап отырған жоқ. Алайда белгіленген мерзімде хабарлама жіберілмесе, кәсіпкер автоматты түрде жалпыға бірдей белгіленген салық режиміне ауыстырылады.

Екі ай бойы жеке кәсіпкерлерге өтінім беруді ұмытпау үшін push-хабарламалар, телефон қоңыраулары және шақырулар жіберіледі.

Өтінімді бірнеше жолмен беруге болады:

• Салық әкімшілендірудің ақпараттық жүйесіндегі (СӘАЖ) салық төлеушінің жеке кабинетінде;
• ірі банктердің мобильді қосымшалары арқылы.

Функционал қазірдің өзінде сынақтан өтті және 2026 жылғы 1 қаңтардан бастап қолжетімді болады. Берілген барлық өтінімдер салық жүйесінде автоматты түрде көрсетіледі.