«Кселл» акционерлік қоғамы — Қазақстанның телекоммуникациялық нарығындағы ірі ұялы байланыс операторларының бірі, 2024 жылдың 4 тоқсаны мен 12 айындағы қаржылық нәтижелер туралы хабарлайды.
Сенімді өсім, жаңа технологиялар мен ауқымды инфрақұрылымдық жобалар - осылайша Kcell 2025 жылға аяқ басып, саладағы көшбасшылықты нығайтып, телеком-нарықты дамыту бағытын анықтады. Компания кірісті 6% — 241,3 млрд теңгеге дейін ұлғайтып, 5G желісінің қамту аймағын кеңейтіп, Алматы метросында мобильді байланысты іске қоса отырып, маңызды жобаларды іске асырды. Операциялық және қаржылық қорытындылар Қазақстан қор биржасының (KASE) «Эмитент күнінде» ұсынылып, онда Kcell өзінің жетістіктері мен болашақтағы басымдықтарын баяндады.
Өткен жыл Қоғам үшін тұрақты өсім мен ауқымды инвестициялар жылы болды. Компанияның жалпы кірісі 241,3 млрд теңгеге жетті, ал таза кірісі 10,1 млрд теңгені құрады. Абоненттік база 7,9 млн клиентке дейін ұлғайды: бұл пайдаланушылардың сенімі мен компанияның қызметіне деген тұрақты сұраныстың негізгі индикаторларының бірі. 5G желісін пайдаланушылардың үлесі де сенімді түрде өсіп, 27,4%-ға жетті, бұл қазақстандықтардың мобильді интернеттің жаңа деңгейіне көшуге дайындығын растайды.
Kcell инфрақұрылымды дамытуға қомақты қаражат бағыттауды жалғастыруда. Соңғы 2 жылда ғана компания желіге 255 миллиард теңге инвестиция салды, оның ішінде 5G жиілігі үшін бюджетке төленген 78 млрд теңге бар. Салыстырып қарайтын болсақ: 2020-2022 жылдары инвестиция көлемі жыл сайын 25-40 млрд теңгені құрайтын. Осылайша, компания инфрақұрылымға құйған инвестиция көлемі бойынша саланың көшбасшысы мәртебесін сенімді түрде бекітті.
«Біз тек технологияға ғана емес, Қазақстанның болашағына инвестиция құюдамыз. Байланыс — бұл жай ғана қызмет емес, әр адамның экономикасы, медицинасы, білімі мен өмірі үшін маңызды инфрақұрылым. Біз бұл инфрақұрылымды жүйелі және дәйекті түрде құрып жатқан компаниямыз. 2024 жылы инфрақұрылымға салынған инвестиция көлемі шамамен 80 миллиард теңгені құрады. 2025 жылы компания валюталық бағамның ауытқуына байланысты импорттық жабдықтар құнының өсуіне, сондай-ақ пайыздық ставкалардың көтерілуіне байланысты қарыздық қаржыландырудың қымбаттауына қарамастан, күрделі салымдардың салыстырмалы деңгейін сақтауды жоспарлап отыр. Негізгі қаражат бесінші буын желісін одан әрі өрістетуге, жабдықтарды жаңғыртуға және бүкіл ел бойынша байланыс сапасын арттыруға бағытталады», — деп атап өтті «Kcell» АҚ Бас қаржы директоры Сабиғат Рахметов.
2024 жылы Kcell желісіндегі интернет-трафик 22% артып, 246,2 Пб жетті. Бір пайдаланушыға шаққандағы трафиктің орташа көлемі өткен жылмен салыстырғанда 14,7% өсіп, 16,4 Гб құрады. Деректерді тұтыну көз ілеспеес жылдамдықпен өсуде: 2020 жылдан бастап Kcell/activ желілеріндегі трафик көлемі 88% артқан. Бұл өсім желіге үлкен салмақ түсіруде. Байланыстың жоғары сапасын қамтамасыз ету және өсіп келе жатқан қажеттіліктерді басып озу үшін компания инфрақұрылымды белсенді дамытуды жалғастыруда.
Трафиктің өсуі тек жалпы трендтерді ғана емес, сонымен қатар Kcell қалалардағы байланыс сапасын арттыру үшін жүзеге асыратын нақты жобаларды да растап отыр. Соның бірі Алматы метросында 5G желісін іске қосу болды: Қазақстанда тұңғыш рет бесінші буын байланысы жер астында қолжетімді болды. Бүгінде тұрақты жабын 9 станцияда жұмыс істеп, жолаушыларға интернетті станцияда шектеусіз пайдалануға мүмкіндік береді. Жоба қысқа мерзімде жүзеге асырылды және қалалық инфрақұрылымды цифрландыру бойынша кешенді бағдарламаның бір бөлігі болды.
Желінің ауқымды кеңеюі бүкіл ел бойынша жалғасты. Соңғы тоқсанда ғана 171 жаңа 5G базалық станциясы іске қосылды, ал олардың жалпы саны 1600-ден асты. Бүгінде бесінші буын желісі Қазақстанның 23 қаласында миллионнан астам қазақстандыққа қолжетімді.
Сонымен қатар, компания ауылдық жерлерде байланысты белсенді дамытуда. 2024 жылы ауылдарда 433 4G базалық станциясы орнатылды, ал 2025 жылдың алғашқы екі айында — 100 мыңға жуық адамды қамтыған тағы 52 елді мекенде орнатылды. Аймақтарға және байланыстың әлеуметтік қолжетімділігіне баса назар аудару желі құрылысында ғана емес, тарифтік саясатта да көрініс тапты.
«Ауылдағы байланыс — картадағы жабын туралы емес, адамдардың мүмкіндіктерге қол жеткізуі туралы. Ауылдағы интернет қаладағыдай тұрақты әрі жылдам болуы тиіс. Біз оған біртіндеп қол жеткізудеміз. Бұл ретте әрбір абонентке оқушы, студент немесе үлкен отбасы болсын, жеке ыңғай қажет. Өткен жылы біз түрлі топтардың өмір сүру стилі мен қажеттіліктерін ескеріп, оларға арнап арнайы тарифтерді жасадық», — деп атап өтті «Kcell» АҚ бас коммерциялық директоры Қазбек Шаимов.
Мәселен, жастар үшін арттырылған трафик көлемі бар, білім беру сервистеріне қол жеткізуге мүмкіндік беретін «Имба» және «Студент» тарифтік жоспарлары іске қосылды. Үлкен отбасылар үшін интернет пен минуттарды бірнеше нөмірге бөліп беруге мүмкіндік беретін біріктірілген топтамалардың жаңа желісі пайда болды. Ал «Әлеуметтік» тарифі мүмкіндігі шектеулі абоненттер үшін одан да қолжетімді бола түсті: енді ол 10 ГБ интернет пен 1790 теңгеге 100 минутты қамтиды және оны ел бойынша Kcell-дің кез келген сату нүктесіне қосуға болады.
2025 жылға арналған қаржылық болжам компания дамуының тұрақты оң динамикасының жалғасуын растайды. Кірістің өсу қарқыны сақталады деп күтілуде, бұл ретте EBITDA бойынша рентабельділік деңгейі Kcell операциялық қызметінің тиімділігін көрсете отырып, 37-37,5% тұрақты деңгейде қалуда.