Қазақстандағы инфрақұрылым деңгейі қызмет түрлеріне қарай әрқилы болып келеді. Сонымен қатар аймақтар мен елді-мекеннің статусына байланысты да инфрақұрылым деңгейі әрқалай. Мәселен, 2020 жылғы мәлімет бойынша республиканың 100%-ы электр қуатымен қамтылған екен.
Мобильді интернетпен халықтың 86,9%-ы қамтылса, су тартылған үйлер саны 77,4%.
Қоқыс жинау мен төгу жұмыстары жолға қойылған үйлер саны республикадағы үйлердің 74,3%-ы, ал орталық кәріз жүйесіне үйлердің 55,1%-ы қосылған. Ал орталық кәріз жүйесіне қосылған әжетханасы бар үйлердің саны 53,6%.
Орталық жылумен қамтылған үйлер 50,9%, табиғи газ желілеріне қосылу көрсеткіші 48,6%.
Кабельді телевидениеге үйлердің 44,6%-ы қосылса, үйлердің 42%-ы орталық ыстық суды пайдалана алады.
Сонымен қатар үйлердің 38,7%-ына бекітілген интернет тартылған, 34,4%-на бекітілген телефон байланысы тартылған, 34%-ы спутниктік телевидениемен қамтылған.
24,3% ғана газбен жылыту жүйесіне қосылса, 23,2%-ы эфирлі телеарна көре алады. 20,3%-да ғана электр пеші бар.
Бұдан да маңызды мәселелердің бірі, халықтың 4,1%-ы медициналық қызметтерге қол жеткізе алмайды. Оның себебі елді мекеннің шалғайлығы немесе жолдың жоқтығы. Ал балалардың 80,2%-ы ғана балабақшаға бару мүмкіндігі болса, 85,3%-ның ғана мектепте оқи алатын мүмкіндігі бар.
Интернеттің бәріне қолжетімді екені жасырын емес, бірақ сапасына байланысты сұрақ көп. Қалай дегенде де, үйлердің 99,1%-да интернетке қосылу мүмкіндігі бар. Халықтың 54,7%-да ноутбук бар екен.