Ұлттық статистика бюросының деректеріне сәйкес, 2025 жылдың қорытындысы бойынша Қазақстандағы апатты тұрғын үйлердің саны 2,6 мыңға жетті. 2024 жылмен салыстырғанда бұл көрсеткіш 6,9% немесе 169 ғимаратқа артқан.

Мұндай құрылыстардың жалпы алаңы 808,2 мың шаршы метрден 834 мың шаршы метрге дейін ұлғайды. Қазіргі таңда мұндай қауіпті жағдайда 50,3 мың адам тұрып жатыр. Бір жыл бұрын бұл көрсеткіш төмен еді — 47,7 мың адам.

Ең қиын жағдай Атырау облысында қалыптасып отыр, мұнда 705 қауіпті нысан бар. Алматы қаласы апатты үйлер тіркелмеген жалғыз қала болып қалды.

Елдегі үйлердің жалпы саны 2,59 млн-ға жетті. Жер үйлердің саны 2,29 млн-ға дейін өсті. Сонымен қатар көппәтерлі үйлердің саны 306,4 мыңнан 299,6 мыңға дейін қысқарған. Қазіргі уақытта қалаларда 1,07 млн құрылыс, ал ауылдарда 1,52 млн нысан орналасқан.

Елдің жалпы тұрғын үй қоры 447,2 млн шаршы метрге дейін өсті. Бір жыл ішінде 13 млн шаршы метрге жуық жаңа баспана қосылды. Тұрғын үйлердің басым бөлігі — жеке меншікте. Мемлекет меншігінде небәрі 10,1 млн шаршы метр баспана бар.

Тұрғын үй алаңы бойынша үздік 4 өңір:

• Алматы: 58,3 млн ш.м;

• Астана: 39,7 млн ш.м;

• Түркістан облысы: 35,3 млн ш.м;

• Алматы облысы: 32,6 млн ш.м.

Айта кетсек, орташа есеппен қалалықтар 27,4, ауылдықтар 21,3 шаршы метрде тұрады.