ҚазМұнайГаз акциясының бағасы рекордтық 26 мың теңгеден асқан тұста, компания 2025 жылдың өндірістік нәтижелерін жариялады.
Қор көлемі мен өндіру көрсеткіштері
Дәлелденген және ықтимал қорлар (2P): 1,1% артып, 724 млн тонна мұнай баламасын құрады. Бұл ретте өндірілген мұнайдың орнын толтыру көрсеткіші 100% болды.
Мұнай және газ конденсатын өндіру 10% өсіп, 26,2 млн тоннаға жетті. Өсімге негізгі үлесті мегажобалар қосты: Теңіз (+40,3%) және Қашаған (+4,9%). Ал Қарашығанақ жобасында өндіріс 0,5% азайған. Операциялық активтер жалпы алғанда өткен жылғы деңгейде қалды.
Газ өндіру 19,8% артып, 11,45 млрд м³ құрады.
Мұнай тасымалдау
Мұнай тасымалдаудың жалпы көлемі іс жүзінде өзгеріссіз қалып, 83,3 млн тоннаны құрады (-0,2%). Дегенмен, құбыр арқылы тасымалдау 3,3% өссе, теңіз арқылы тасымалдау 18,7% төмендеген.
Мұнай өңдеу және өнім шығару
Мұнай өңдеу көлемі тарихи максимумға жетіп, 20,9 млн тоннаны (+9,5%) құрады.
Қазақстандық МӨЗ-дер өңдеуді 3,2% арттырды.
Румыниядағы KMG International активтері өндірістік қуаттар қалпына келтірілгеннен кейін өңдеу көлемін бірден 27,9% өсірді.
Мұнай-химия өнімдері
Мұнай өнімдерін өндіру 10,1% өсіп, 19,7 млн тоннаға жетті (соның ішінде бензин – 12,5%, дизель – 18,1% өсім көрсетті).
KPI зауыты полипропилен шығаруды 51,4% арттырып, 186,6 мың тоннаға жеткізді, ал оның экспорты 44% өсті.
Айта кетсек, Қазақстанда төртінші мұнай өңдеу зауыты салынады. Энергетика министрлігі Маңғыстау немесе Ұлытау облысында қуаттылығы жылына 5 млн тонна жаңа мұнай өңдеу зауытын салу қарастырылып жатқанын, жоба алдын ала инвестиция тартуды талап ететінін, сонымен қатар инвестицияның өтелуін қамтамасыз ету үшін авиаотынның өзіндік құны жоғары болатынын айтқан еді.